Çinque scain
De solitu, e scôe ciù i sun longhe, ciù i han tante storie da cuntò, cun i soi scain de môrmu, de ardesia, de maùi, de granitu, de cemèntu e de autri saccranui. De côse i ne han vistu tütte: longhe, cürte, bèlle e brütte!
Ah! Se i scain i puressèn parlò: quante veitai i cunteèvan, quanta gente i faèvan tremò!
Mi, a me sùn appasciunò a “çinque scain” de mörmu giancu che pe tüttu l’annu, in maestusu silènsiu, i se lascian baxiò da u su, dall’ôiga e da u vèntu.
Çerti giurni, i ven cuvèrti de tante sciûe e rizu, pè spûzi; autre vôte i sun bagnàe da e laggrime e i vegghen di sguôrdi pietusi…!
I sun i scaìn da noscia Gexia, a Gexia de San Matté, l’urgugliu de nui de Leigöia, che tanti i ne invidian e i vurreévan avé.
Quante vôte, in ta vitta, a l’ammu muntau e caàu sti scain! Millanta!! a dixeva me nonna!
Ma coèllu che u me ha ispiau sta riflessiùn u l’é stau u pensceu che a primma e l’urtima vöta che a muntammu sta scôa, i nosci péi i nu tuccan i scaìn. Perché?
A primma vôta a semmu in te brasse de noscia möe che a ne porta cuntenta a battezzò.
E l’urtima vôta a semmu in te spalle de quattro amixi, vestii de neggru, che i ne portan, pé sèmpre, a ripuzò…!
De nôtte, invece, u vén u bèllu; i scain, a brancae, i contan mioi de stelle e i se fan baxiò da-alüna che punpûza, a l’ingianca, cumme velu da spûza
Çerte sèe, u se ghe sètta cubbie de innamuai e i scaudan sti scaìn, strèti strèti… abbrassai.
Oh côi çinque scaìn, in tu vosciu maestûzu silènsiu i cunservai a storia de tanti Laiguein e i cunusciei, de tütti, i nosci destin.
(Bianca ha salito quei cinque gradini quest’anno per l’ultima volta. Volevamo solo ringraziarla per tutto quello che ha sempre fatto per Laigueglia e per quello che ci ha lasciato)